Исәт мәктәбендә истәлек такталары ачылды

Подробности

Опубликовано 28.04.2019 15:24

Просмотров: 337

26 апрель көнне Ялутор районы, Исәт урта мәктәбенең стенасына РСФСРның халык мәгарифе отличнигы Рәхимгәрәй Алимбаев белән СССРның халык мәгарифе отличнигы, “Кызыл Йолдыз” ордены кавалеры Мирсат Латыйпов хөрмәтенә истәлек такталары куелды. Рәхимгәрәй Ильяс улы 1948 елдан алып 1988 елга хәтле бу мәктәптә балаларга тарих дәресен укыта. Һәм 28 ел завуч вазифасын башкара. 1988 елда лаеклы ялга чыккач та, мәктәп каршында музей булдыра, авыл тарихын язып калдыра. 2001 елның 29 августында аның йөрәге тибүдән туктый.

2003 елда Исәт мәктәбенә Р.Алимбаев исеме бирелә. Мирсат Әбделхак улы 40 елдан артык гомерен балаларга белем, тәрбия бирү эшенә багышлый, озак еллар мәктәпне җитәкли. Фидакарь хезмәтенә илебез олы бәя биреп, бик күптөрле орден-медальләр, Мактау кәгазьләре белән бүләкләнә. 2004 елның 8 июнендә ул вафат була.

Истәлек такта кую чарасында Ялутор район хакимияте башлыгы Андрей Гильгенберг, авыл хакимият башлыгы Нур Сөлкәрнәев, өлкә чик сакчылары ветеран советы рәисе Нуретдин Ибраһимов, Ялутор шәһәр мәчете имамы Раил хәзрәт Мәхмүтов, М.Латыйповның бертуган энесе, авыл имамы Әнис Латыйпов, Р.Алимбаев улы Рамил Алимбаев һәм укытучылар чыгыш ясадылар. Укучылар укытучы абыйларның тормыш юлларын сөйләп, матур җырлар башкардылар. Җыелган халыкка “Яшь буын” татар яшьләре оешмасы җитәкчесе Фәрид Корманов һәм авылның оста җырчысы Әлфинур Латыйпованың башкарган җырлары да бик ошады. Такталарга ябылган җәймәләрне тантаналы рәвештә ачканнан соң, һәркем чәчәкләр салды. Аннары кунакларны укытучылар һәм укытучы абыйларның балалары, якыннары тырышлыгы белән әзерләнгән бай табынга чакырдылар. Әнис хәзрәт Латыйпов мәрхүмнәр рухына багышлап Коръән укыды. (Тулырак мәгълүматны “Ядарыш” битләрендә укырсыз).

Рәүфә КАНГАЗИНА.