Гран-при бүләген алучылар

Подробности

Опубликовано 26.12.2025 11:14

Просмотров: 149

Тубыл шәһәренең күппрофильле техникумының сәнгать һәм мәдәният бүлегенең «Дуслык» бию ансамбле (хореографы Мөнәвәрә Андрущик) «Мaqic universe» халыкара иҗат конкурс-фестивальдә катнашып җиңү дипломнарына һәм Гран-при бүләгенә лаек булды.

«Дуслык» бию ансамбленең алыштыргысыз җитәкчесе, танылган хореограф, РФнең мактаулы мәдәният хезмәткәре Мөнәвәрә Вәлиҗан кызы: «Бәйгеләрдә җиңү яулау - ул хореографның, биючеләребезнең уртак тырышлыгын күрсәтә. Ансамбльдә талантлы биючеләр катнаша. Быел «Дуслык» ансамбле 25 еллык юбилеен билгеләп үтәчәк. Биюче-студентлар алышынып барса да, ансамбльнең дәрәҗәсе төшмәде. Бәйгедә катнашып җиңү яулаганыбыз бу күренешне тагын бер мәртәбә дәлилләде.

Тубылның профессиональ дәрәҗәдә биюче ансамбльләр арасында «Дуслык» танылган ансамбль. Красноярск шәһәрендә узган бәйгедә биючеләр үзләренең иҗади номерларын тәкъдим итеп мактаулы бүләкләр, җиңү дипломнарын, Гран-при һәм 15000 премия алып кайттылар. «Дуслык» ансамбле башкаруында «Татар вальсы», «Чабата», «Бервакыт урманда» биюләре беренче урын Лауреат дипломнарына лаеклы булды. «Әй, сугыш» бию Гран-при дипломын һәм бүләген алды. «Дуслык» ансамбле биючеләре дәрәҗәле бәйгедә катнашып лаеклы чыгыш ясадылар. Без шатбыз һәм горурланабыз. Ансамбль Россия күләмендә, Төмән өлкәсендә узган төрле дәрәҗәле бәйге-фестивальләрдә катнашып җиңү дипломнарына лаеклы булды. Чираттагы уңышлы чыгышлары мактауга лаек. Студентлар белән эшләүнең бер үзенчәлеге бар. Укуларын тәмамлаган студентлар сайлаган һөнәрләре буенчә хезмәт итәләр, эшкә урнашалар, аларга алмашка башкалар килә. Яңа килгәннәрне бию сәнгатенә өйрәтү, сәхнәне, тамашачыларны яратырга, хөрмәт итәргә тәрбияләү башлана. Студентларның яңа уңышларын күреп, сөенеп, яңа сынауларга әзерләнеп үтә безнең уку елы», - дип уртаклашты Мөнәвәрә Адрущик.

Римма Умитбаева.