Җәзиләбез сынатмый

Подробности

Опубликовано 26.12.2025 09:33

Просмотров: 156

Төмән кызы, Россия дәүләт гадел хөкем университетының (Санкт-Петербург) Төньяк-Көнбатыш филиалы студенты Җәзилә Сөрмәтованың тырышлыгы, сәләте, уңышлары белән горурланып, «Яшьлек» сәхифәсендә таныштырып барырга тырышабыз. Мәсәлән, күптән түгел ул «Ел студенты – 2025» бүләкләү тантанасы кысаларында «Волонтерлык эшчәнлеген иң яхшы оештыручы» һәм «Сәнгатьтә казаныш» номинацияләрендә җиңүче булды. Һәм менә тагы ул 11 декабрьдә «Горный» күпфункцияле комплексында узган яшь галимнәр һәм белгечләрнең 28 нче Санкт-Петербург ассамблеясенең тантаналы утырышында катнашты.

Ассамблея яшьләр арасында фәнни, фәнни-техник һәм белем бирү эшчәнлеген популярлаштыруга юнәлдерелгән. Ул шәһәрнең яшь галимнәренә үзләренең фәнни проектларын, белемнәрен һәм казанышларын күрсәтергә мөмкинлек бирә, алар Санкт-Петербург хөкүмәтенең стипендиатлары һәм грант алучылары булдылар. Традиция буенча ассамблея 700дән артык катнашучыны - грантлар конкурсында җиңүчеләрне, Санкт-Петербург хөкүмәте стипендиатларын, хакимият, сәнәгать предприятиеләре, фәнни-мәгариф җәмәгатьчелеге вәкилләрен җыя.

Тантаналы утырышны Санкт-Петербург губернаторы Александр Беглов ачып җибәрде. Ул түгәрәк өстәлләрнең иң яхшы докладчыларын — грантлар конкурсында җиңүчеләрне һәм Санкт-Петербург хөкүмәтенең исемле стипендиатларын бүләкләде, шулай ук барлык конкурсантларга ирешкән нәтиҗәләре өчен рәхмәт белдерде.

Санкт-Петербургның яшь галимнәр һәм белгечләр ассамблеясендә катнашучыларны шәһәрнең әйдәп баручы югары уку йортлары һәм предприятиеләре вәкилләре дә котладылар.

Санкт-Петербург хөкүмәте стипендиатлары арасында Җәзилә Сөрмәтова да бар иде. Җәзилә  Дәнис кызы күп еллар уку йортының алыштыргысыз активисты, горурлыгы булып тора. Укуда гына зур казанышлар түгел, ә күп санлы иҗади бүләкләргә дә ия ул.

Рәүфә КАНГАЗИНА.