Күкрәндегә сәяхәт

Подробности

Опубликовано 14.02.2025 19:13

Просмотров: 602

Күкрәнде авылына күп кунаклар килде, бу инде традициягә әверелгән изге күренеш. Кунакчыл, рәхимле Мәрвәр белән Фаил йортында Моратовлар токымы хәтем ашы үткәрделәр. Бу эшне мәрхүм Мөнир Моратовның, өлкәнең атаклы журналистыбыз Азат абый Сәгыйтовның яшь чактагы кәләмдәшенең Ханты-Мансийскийда яши торган улы Ринат башлады. Оештыручылар: Мөнирә апа Толстогузова, Фәиз абый Исхаков (быел килә алмады), Илдар Азанов, Нәсимә Корманова, Төмәннән Азат Моратов мәрхүмнең кызы, оныгы, хатыны Тәрзия, Римма Мергасова, Хәрис абый мәрхүмнең хатыны Гайшә, кызы, оныгы, Тубылтора авылыннан Сания һәм Сәфәр Назыровлар һәм башкалар килделәр.

Гөрләшеп Сәгыйдә апа Айтбакова мәрхүмәнең кызлары, оныклары, пешкән ризыклар тутырып килеп керделәр. Авыл халкы да шактый җыелды. Яшь, матур кызлар - Оксана Ткачева, Венера Моратова, Венера Шәрипова, Гөлфирә Моратова, Диләрә Гайсина йөгерә-йөгерә өстәл карадылар. Ләчек авылыннан килгән Әмир мулла Алеев Коръән сүрәләре укып, каткан күңелләрне эретерлек теләкләр теләп, дога кылды. Кайда гына ятмый безнекеләр, Белоруссиядән башлап, бөтен илгә таралган. Барысына да хәер догалар барып җитсен, иншАллаһ.

Күкрәнде, саз як авылы булгангамы, әллә нинди тылсымлы күренә. Һавасы чиста, тын алулар да бик җиңел, карлары ап-ак, монда яшәгән кунакчыл халкының күңеле сыман. Йортлары төз, пөхтә, туган нигезне онытмыйлар, йорт буш торса да, нәсел җебен өзмичә, килеп карап йөриләр. Гомуми күренешне иске мәктәп һәм җимерек клуб бинасы гына боза. Бөек Ватан сугышында һәлак булган авылдашларга куелган һәйкәлне яңартканнар, аны якташлар үзләре акча салышып эшләгәннәр.

Күкрәндегә бу сәяхәт нәсел җебен өзмичә, туганлашып, токымлашып, олыларның сүзен тыңлап, хөрмәтләп, очрашып яшәргә ярдәм итсен.

Гөлсинә ТАШКЕЕВА.

Тубыл шәһәре.
Рәсемдә: Моратовлар токымы.