Кара диңгезгә сәяхәт

Подробности

Опубликовано 15.09.2017 11:16

Просмотров: 546

Быел мин җәйге каникулымны бик кызыклы үткәрдем. Июнь аенда әти-әни һәм мин җиңел машинабызга утырып Россия буенча сәяхәт ясадык. Юлда кунакханәләрдә кунып, дүрт тәүлек дигәндә Анапага барып җиттек. Анапа – Кара диңгез буенда урнашкан кечкенә курорт шәһәре икән. Без килгәндә диңгез суы һәм һава торышы салкын иде, соңыннан җылынды. Бер көнне нык су коенасы килгәч, машинабызга утырып Краснодар краеның Тамань станицасына бардык. Анда диңгез суы җылы иде. Бөек рус шагыйре Михаил Лермонтовның музеена кердек. “Герой нашего времени” китабын укыганым бар. Китаптагы Таманьны күрүемә шатландым. Музей зур түгел, бер кечерәк өйдә урнашкан.

Анапага барганда Волгоградка кердек. Шәһәрне Идел елгасы буйлап 100 чакрымга сузылган, дип сөйләделәр. Монда әтиемнең дусты Дәүләт абый 2018 елда уздырылачак футбол буенча дөнья чемпионаты өчен стадион төзи. Аның белән күрешкәннән соң Мамай курганына бардык. Мәһабәт, зур Ватан ана һәйкәленә карап сокландым, нинди уй кичергәнемне сүз белән генә әйтеп булмый. Бөек Ватан сугышында һәлак булган бабаларыбыз искә төште, күздән яшь акты. Россиянең олылыгына, киңлегенә шаккатып бардым. “Чыннан да ай-хай зур безнең Ватан!” – дип хәйран калдым. Кырларның, урманнарның, далаларның иге-чиге юк. Күп шәһәрләрне күрдем, әмма Төмәннән дә матурракны, чистаракны очратмадым. Төмән – заманча төзекләндерелгән бай шәһәр. Мондый күркәм шәһәрдә яшәвемә җитәкчеләргә зур рәхмәт! Шуны әйтәм: ихлас күңелдән ял итү өчен бернинди Төркия, Кипр кирәкми, үзебезнең диңгезләребез дә бик шәп!

Ильяс СӘЙФУЛЛИН, 9 сыйныф укучысы, Төмән шәһәре.