* 1 мартта (хәзергечә 13ендә) кояшлы көн булып, һава тын торса, яз яхшы килер, җәй буена һава яхшы торып, һәртөрле ашлыклар уңар.
* Март башында тамчы тамса, җәй яхшы килә.
* Март башында чыпчык эчәрлек су булса, ел яхшы килер.
* Яз иртә килсә, ашлык уңар.
* 1 мартка кадәр кара карга күренсә, кар тиз китәр.
* Кара карга килгәч, җиргә төшсә, яз кыска килер; ояга төшсә, яз озын килер.
* Кар кояш белән китсә, бодай уңар.
* Яз көне тамчы бозлары озын булса, сабан ашлыгы озын (биек) булыр, әгәр кыска булса, ашлык кыска булыр.
* Язгы ташкын шәп булса, иген уңар.
* Елгаларда боз төнлә китсә, ашлык уңар.
* Елгаларда яз көне боз тиз арчылса да, ашлык яхшы уңар.
* Аккош иртә килсә, яз начар килер, озак торыр; салкын булыр, кар тиз китмәс.