Юлия биегәндә идәннәре бөгелә

Подробности

Опубликовано 05.05.2017 07:39

Просмотров: 595

Быел Яркәү районы “Таң йолдызы” балалар фестивалендә Кызылъяр мәктәбе укучылары бию номинациясе буенча дәрәҗәле урыннарны беркемгә дә бирмәделәр. Җиңүчеләр арасында Юлия Корманова да булды. Ул укытучысы Гөлназ Юсупова белән өйрәнгән “Су буенда” дигән җитез биюне башкарып, 2 урынны яулады. Юлия 6 сыйныфта гел яхшы билгеләргә генә укый. Биергә аны 9 яшендә Фатыйма апа Кучемова өйрәткән. Хәзер Юлия авыл мәдәният йортында оештырылган “Шаян кызлар” төркемендә дә бии һәм шунда ук җырлый да. Күптән түгел Яркәү авылында узган “Барсы да бииләр” район бәйгесендә төркемнәре белән биеп беренче, өченче урыннар яулаганнар.

Юлия спорт ярата, йөгерә, чаңгыда шуа, үзлектән гимнастика белән дә шөгыльләнә һәм район күләмендәге ярышларда югары нәтиҗәләр күрсәтә. Буш вакытларында биюче кызы әти-әнисенә өй эшләрендә булыша, китап күп укый, иптәш кызлары  - Анжела Петрова, Александра Ульяшева, Розана Шәфыйкова белән аралаша. Юлия “Яңарыш” газетасын да укый, бу турыда ул: “Бигрәк тә “Балалар” һәм “Яшьлек” сәхифәләрендә басылган язмаларны укырга яратам. Газетада Люция апам һәм әтием Динар Корманов турында мәкаләләр басылды. Без аларны гаиләбез белән бергәләшеп укыдык, ул саннарны кадерләп архивыбызга салып куйдык”, - дип сөйләде.

Рәүфә КАНГАЗИНА.