Җирдәге иң зур күл – Каспий диңгезе (371 мең кв. км).
Иң кайнар күл Камчаткадагы Фумароль күле. Аның температурасы 50 градустан артык. Бу күлдә тереклек яши алмый.
Иң салкын күл – илебезнең Таймыр ярымутравында, аның суы иң җылы вакытта да 5-7 градустан артмый.
Болгариянең Кара диңгез буендагы Поморие шәһәре янында бер күл бар. Аның төбендә куе кара балчык ята. Шул балчыктан алынган матдә астма, бронхит кебек авыруларны дәвалауда кулланыла.
Алжирның Сиди-бель-Аббес шәһәре янындагы күлгә каләм манып язарга мөмкин. Күлгә агып килгән ике инешнең берсендә тимер тозлары эремәсе күп, икенчесе торфлы сазлыктан агып чыга. Ике суның бергә кушылуыннан чып-чын язу карасы барлыкка килә. Бу күлдә, әлбәттә, балык та, үсемлекләр дә юк.
“Балалар календаре”.