Дару эчкәндә

Подробности

Опубликовано 19.09.2014 10:08

Просмотров: 937

Кайбер даруларны озак вакыт эчү матдәләр алмашында тайпылышлар тууга китерә. Тигезлекне кабат булдыру өчен билгеле бер ризыклар ашарга кирәк. Буын авыртуларын киметү өчен кулланыла торган баш өянәге күзәтелгәндә, хатын-кызларда күрем алды билгесе вакытында эчкән дарулар тәндә фолий кислотасы, тимер, тутыя (цинк) һәм С витамины кимүгә китерә. Алар тозлы кәбестәдә, әфлисунда, грейпфрутта, яшь бәрән итендә һәм кабак орлыкларында бар.

Антибиотиклар кабул итү эчәк микрофлорасы җыелмасы үзгәрүгә китерә. Шуңа да дәваланганнан соң 2-3 атна дәвамында җыелмасында тере микроблар булган дарулар (“Бифидумбактерин форте”, “Бифиформ” һ.б.лар) кабул итәргә кирәк. Аларны биойогыртлар, көрпә, тозлы кәбестә тулыландыра ала. Моннан тыш, антибиотиклар эчкәннән соң, тәннең фолий кислотасына, В12, С һәм К витаминнарына ихтыяҗы туа. Шуңа да дәваланганда һәм аннан соң брәккел, көрән дөге, балык, әстерхан чикләвеге, ак ногыт борчагы ашарга һәм гөлҗимеш төнәтмәсе эчәргә кирәк.

Балага узудан саклаучы дарулар кабул иткәннән соң, магний, тутыя, фолий кислотасы һәм С витаминына ихтыяҗ туа. Шуңа да тукланасы ризыклар исемлегенә кытай борчагы, кузаклыларны, чәчәккәбестәне, кальмар, шпинат һәм үрдерелгән бодайны керү мөһим. Бума чире, буын ялкынсыну, кычыткы һәм башка тире авыруларын дәвалау өчен, стероидлар төркеменә кергән даруларны озак эчкәндә, магний, тутыя, В6, С, Д һәм К витаминнарына ихтыяҗ туарга мөмкин. Бу кимчелекне бетерү өчен, арпа һәм солы боткалары, ясмык (чечевица), борыч ашарга кирәк.

(“Юлдаш”).