Зарарлы түген, файдалы

Подробности

Опубликовано 16.01.2015 10:09

Просмотров: 935

“Майлы ризыктан кеше артык килограммнар җыя, ул бик зарарлы” дип күпме генә әйтсәләр дә, организмга анысы да күпмедер күләмдә кирәк. Чөнки майлар организмны туклыклы матдәләр белән тәэмин итә, әле тагын кәефне дә күтәрә.

Пицца. Әлеге ашамлыкның эчлегендә колбаса булганга күрә, күпләр аны калорияле дип атый. Әмма колбасаны яшелчәгә алмаштырып була бит. Сырның да майсызын кулланып була. Юка гына кетердәп торган камыр да энергиягә бай углевод бирә.

Сыр. Чыннан да, сырны күп итеп ашарга киңәш ителми, әмма тулысынча аннан баш тартырга да кирәкми. Чөнки анда кальций, аксым, фосфор һәм А витамины бар.

Шоколад. Әлеге тәм-томда аксым, калий һәм А витамины кебек туклыклы элементлар күп. Ә менә куе көрән төстәгесендә (темный) бакыр күп, ул йөрәк-кан тамырлары авыруларыннан саклый. Шулай ук шоколад баш миендәге серотонин матдәсен (кәефне күтәрә) эшләп чыгаруны да арттыра.

Йомырка. Йомыркада холестерин күп булуына карамастан, сәламәт кешеләргә аны курыкмыйча ашарга була. Аның сарысында майлар, А витамины, калий бик күп. Шулай ук В, Д һәм Е витаминнары бар. Әмма шулай да табиблар йомырка белән артык мавыкмаска киңәш итә: атнага 3-4 данә җитә, диләр.

Макарон. Әгәр дә макаронны соустан һәм иттән башка ашасаң, аның бернинди зарары да юк. Бер тәлинкә токмачта нибары 200 ккал. Анда калий, кальций, тимер, ниацин һәм бераз аксым бар, ә менә май бөтенләй юк.

Көнбагыш. Әлбәттә, фигура саклаган кешеләргә көнбагыш белән артык мавыгырга ярамый. Тик анда файдалы матдәләр җитәрлек булуын да онытмаска кирәк. Көнбагыш, якынча 20 процентка протеиннан тора. Анда шулай ук клетчатка, калий, цинк, тимер һәм В витамины да бар.

Туңдырма. Эссе җәйге көндә туңдырма ашаудан тыелып калып буламы соң?! Анда, чыннан да, шикәр һәм каймак микъдары күп, әмма кальций белән протеин да аз түгел. Симерүдән курыккан кешеләргә, әлбәттә, чамасын белеп ашарга кирәк.

(“Дуслык”).