Гаилә – гомер чишмәсе

Подробности

Опубликовано 30.08.2019 00:00

Просмотров: 521

Омск өлкәсеннән Гөлҗиян Бердубаева гаиләсе белән 1960 елны Казанлы авылына (Түбән Тәүде районы) күченеп киләләр. Гаиләдә өч кыз, ике ир бала үсә. Озакламый әтисе вафат була. Иң олылары Гөлҗиян 8 нче классны тәмамлап, эшли башлый: әнисе белән утын кисәләр, мәктәптә идәнен дә юа, складта да җаваплы эш башкара, секретарь-машинистка, хат ташучы булып та эшләргә туры килә. Сеңелләрен, энеләрен аякка бастырырга булыша. Аңа авыл малае Исмәгыйль Хәкимовның күзе төшә, озакламый өйләнешәләр, егет армиягә чакыру кәгазе килгәч, кызны әнисендә калдыра. Ике елдан кайтып, эшкә урнаша. 24 яшендә кинәт авырып китә, 4 ай хастаханәдә ята, врачлар берни дә эшләтә алмыйлар. Баласы Ривальне, яшь хатынын калдырып үлеп китә. Армиядә Даманск утравына командировкага 15 солдатны җибәрәләр, шунда нурланыш алган була Исмәгыйль.

1943 елны Шагидуллиннар гаиләсендә Салихҗан исемле ир малай туа. Тырышып, яхшы укый мәктәптә. 10 класстан соң тагылмачы (прицепщик) булып эшкә керә. Соңыннан тәҗрибәле механизаторны бригадир итеп куялар. 1974 елны Салихҗан матур, кара күзле, кара чәчле Гөлҗиянны очрата. Озакламый авылда яшь гаилә туа, Ривальгә әти, Гөлҗиянга тормыш иптәше була. Йорт салып чыгалар, матур тормыш коралар, эшлиләр. Уллары Рифат туа.

Риваль белән Рифат Төмәндә яшиләр, балалар үстерәләр, механизатор, сантехник булып эшлиләр. Салихҗан авырый башлый, әллә ничә еллар кадерләп, яхшы, хөрмәт итеп ирен карый, аннары мәңгелек юлына озатырга туры килә. Бакчада эш белән, чәчәкләр үстереп, намаз укып, вакыт тиз үтеп китә, диде ул. Балалары, оныклары килеп йөриләр. Якты йөз белән каршы ала. Ике баланы да бик акыллы итеп үстергәннәр.

Тәнзилә ЯРУЛЛИНА, Түбән Тәүде районы, Чугунаево авылы.