Китапка игътибар юнәлтеп

Подробности

Опубликовано 12.04.2019 00:00

Просмотров: 584

Индрәй (Төмән районы) авыл китапханәсендә мәктәпкәчә яшьтәге балалар өчен “Китапханәгә кунакка” исемле дәрес үткәрелде. Кунакларны китапханәче Гөлнара Исмәгыйлова белән Убырлы карчык (Сөембикә Вәлишина) каршы алдылар. Алар сабыйларны кызыклы китаплар белән таныштырдылар. Уен рәвешендә үзләрен тоту кагыйдәләрен, китапларны куллану тәртипләрен төшендерделәр.

“Малайлар һәм кызлар монда китапларның зур һәм кечкенә, калын һәм нәзек булуларын күрделәр, яңа һәм иске китапларны чагыштырдылар. “Әкияти авыл” уенын уйнадылар. Уен барышында әкиятләрдән хайваннарны табарга кирәк иде.

Аннары “Әкиятләр буйлап сәяхәт” викторинасында катнаштылар. Һәм иң яраткан геройларын ясап та күрсәттеләр. Бу чарада бүгенге көн сабыйлары китап-журналлар белән танышып, аларны рәхәтләнеп карап, үзләренә ошаганын әти-әниләре белән укырга алып та кайтып киттеләр. Әлеге дәреснең дә максаты шул иде бит – яшьтән үк китаплар белән кызыксындыру, китапка мәхәббәт уяту”, - дип сөйләде Гөлнара Исмәгыйлова.  

Гөлнур ВӘЛИЕВА.