Туганлык җепләрен саклаучы

Подробности

Опубликовано 15.06.2018 00:00

Просмотров: 571

Язмам мәрхүмнәр Карыйбулла абый белән Мафруза апа Насыйровларның кече уллары Илнат турында бара. Олы уллары Вил гаиләсе белән Ульяновск өлкәсендә, уртанчылары Азат һәм Илнат Төмәндә яшиләр. Арада туган җанлы Илнат туганнарын барлап, чит җирләрдә яшәүчеләренең хәлләрен белешеп тора, вафат булганнарын туган авылларына алып кайтып әти-әниләре яткан зиратта җирли.

Барлык туган-тумачаларын чакырып Коръән укытып, ашларын уздыра. Күптән түгел әтисенең Ишимда яшәүче 90 яшен тутырган бертуганы - Нурулла абыйны вафат булгач, туган авылы Киндерлегә алып кайтып, дини йолаларын үтәп күмделәр.

Нурулла абыйсы исән чагында аның янына барып хәлен белде. Сеңлесе Хәтирә апаның малае Мәлик тә еш баргалап торды. Илнат бик булган, эшчән, ярдәмчел. Һәр елны әти-әнисенә, әби-бабайларына, туганнарына да атап, яшәгән җире Төмәндә дә, авылдагы әти-әнисе йортында да ел саен Коръән укытмыйча калмый. Тормыш иптәше Фәридә белән Юлия исемле бер кыз тәрбияләп үстерделәр. Кыткүлдә агачтан йорт салып умарталар да тота, җәен, кышын ял көннәрен шунда үткәрәләр. Илнат сунарга йөри, урманны ярата. Аллаһы аларга сәламәтлекләрен биреп, сау-сәламәт, тигезлектә картаеп шатлыклы мизгелләр кичереп яшәргә насыйп итсен.

Динара ХӘБИБУЛЛИНА,
Түбән Тәүде районы, Киндерле авылы.