Укучылар 70 тонна чүп җыйганнар

Подробности

Опубликовано 15.10.2021 02:00

Просмотров: 434

“Ил буенча экодежурный” Бөтенроссия акциясе тәмамланды. Россия мәктәп укучылары хәрәкәтенең экологик юнәлешен оештырган проект 10 сентябрьдән 2 октябрьгә кадәр дәвам итте. Шул вакыт эчендә илнең 80 төбәгендә массакүләм шимбә өмәләре узды, анда 70 тоннадан артык чүп-чар җыелган иде.

Экология министрлыгы тарафыннан билгеләнмәгән төбәкләр дә актив катнашты, шул исәптән Төмән өлкәсе дә читтә калмады. Шулай итеп, сентябрь ахырында укучылар шәһәр паркларында һәм ишегалларында өмәләр үткәрделәр. Аларга гади үтеп баручылар да кушылдылар.

Экологик хәлне яхшырту өчен Шыкча урта мәктәбе укучылары һәм Россия мәктәп укучылары хәрәкәтенең активистлары укытучы Гүзәл Зәйнуллина җитәкчелегендә Шыкча авылы территориясен җыештырырга чыкканнар, Түре елгасының ярын тәртипкә китергәннәр.

Җыелган калдыкларның контроль үлчәнүен барысы да түземсезлек белән көтеп алганнар. Үлчәү 47 килограмм күрсәткән.

Укучылар һәркем экологияне яхшыртуга үз өлешен кертә ала дип өндиләр. Иң кечкенәдән башлагыз: чүпне тиешле булмаган урыннарга ташламагыз. Табигатьнең чисталыгы - безнең кулларда!

Ләйлә МАДЬЯРОВА