Казан безне гашыйк итте

Подробности

Опубликовано 27.07.2018 00:00

Просмотров: 664

Казанның “Заречье” лагеренда 21нче июньнән 9нчы июльгә кадәр “Дуслык” исемле регионара профиль сменасы үтте. Бу форумга бөтен Россиядән, Казахстаннан, Берләшкән Гарәп Әмирлекләреннән 176 бала килде. Төмән районыннан Индрәй мәктәбеннән Алинә Алеева, Ямбай мәктәбеннән Артур Алтынгузин һәм Ариана Гайнуллина, Шыкча мәктәбеннән Адилә Баязитова һәм Ләйсән Айдбаева шушы чарада катнаштылар.

Смена татар балалары өчен оештырылган иде. Күңел ачу өчен генә түгел, ә балаларның белемнәрен үстерү өчен төрле чаралар уздырылды. Татар, испан һәм инглиз телләре дәресләре дә булды. Профориентацион максат белән балаларга Татарстан Республикасының атказанган артисты Мингол Галеев, татар эстрадасы йолдызлары: Гүзәл Уразова, Илдар Хәкимов һәм Мөнир Рахмаев, “Татарстан – Яңа гасыр” телеканалының алып баручысы Альбина Асылгәрәева, данлыклы татар шагыйре Роберт Миңнулин, Республиканың Милли китапханәсе хезмәткәрләре кунакка килделәр.

“Иң зур тәэсир - Казан үзе. Безгә бәхет елмайды, чөнки сәфәребез футбол буенча бөтендөнья чемпионатына туры килде. Үзәк урамнарда төрле милләт халыклары йөри, бердәмлек атмосферасы хөкем сөрә. Һәркемебез бу шәһәргә тагын да кайтырга тели, чөнки Казан безне шундый дәрәҗәдә яулады. Кемдер Бауман урамыннан үтәргә тели, Кремль мәйданында көч җыярга, Кабан күле белән сокланырга, ә кемдер Казанның уку йортларына кереп, үз гомерен шушы мәһабәт шәһәр белән бәйләргә хыяллана”, - дип үз тәэсирләре белән бүлештеләр төмәнлеләр.

Рафаэль Галимҗан улы Гадиевка һәм безнең укытучыларыбызга рәхмәтләр әйтәсе килә.

Ләйсән АЙДБАЕВА,
Төмән районы, Шыкча авылы.