Көсәйкүлдә Ураза Гаете

Подробности

Опубликовано 07.07.2017 08:42

Просмотров: 675

Ураза көннәрендә мәчеткә җыелып Гает намазын, бәйрәм хөтбәсен уку, вәгазь тыңлау, Коръән ашын үткәрү Көсәйкүл авылы мәчетендә традициягә кергән инде. Бу изге эшләрне авыл хатын–кызлары үзләре башкаралар. Быел авыл мәчетендә сарык суеп Коръән ашын Фәүзия Равил кызы Сафиева гаиләсе үткәрде. Мәчеткә авылдашларын җыеп, Аллаһы турында һәркемнең исенә төшерү саваплы эш булганын сөйләде дин юлында булган Сәрвәр Әхмәди кызы Якупова. Ул: ”Авылыбызда иманлы, сабыр холыклы якташларыбыз бар әле. Бәйрәм табынын әзерләүдә тату яшәгән яшьләребезгә карап сөенеп утырдык.

Милли ризыкларны күмәкләшеп пешерүдә Зәнфирә Сафиева, Зөлфия Гыйләҗиева, Таһирә Җамалиева, Миләүшә Таирова, Дония Вәлиева, Мәхмүсә Сафиева, Алсу Сәйфетдинова, Әлфирә Хөснетдинова һәм башкалар булыштылар. Гореф-гадәтләребез, тарихыбыз белән кызыксыну яшьләрдә арта бара. Быел Ураза Гаетенә “Слава труду” җирле газета корреспонденты Лариса Гыйззәтуллина килде. Ул да безнең якташыбыз икән. Авылыбыз турында яңалыкларны өлкә газетабыз “Яңарыш”та да укыйбыз. Динебезне, телебезне, мәдәниятебезне бердәмлектә генә саклап калып була. Ураза Гаете татар халкының кунакчыллыгын, татулыгын күрсәткән, дуслыкка чакырган бәйрәмнәрнең берсе. Шулай булсын! Киләсе Рамазан айларын, Ураза Гаетен исән-имин каршы алырга язсын”, - диде. Көсәйкүлдә Гает намазын Рушан хәзрәт алып барган. Мәчет ишекләре монда һәр көн ачык. Авыл әбиләре: Зәхифә Сөнгатуллина, Галия Айбатова намазга басучыларның саны артсын дигән теләкләрне юллап, исәнлек-саулыклар теләп калдылар.

Римма УМИТБАЕВА.