“Батыр - патриот”

Подробности

Опубликовано 08.05.2015 10:30

Просмотров: 977

Минем карт әтием Шәрифулла Сафиулла улы Нурмөхәммәтов 1937 елны армия хезмәтенә алына һәм шуннан фронтка китә. Ленинград блокадасын, Эстония, Латвия фронтларын үтеп, 1945 елны Берлинга барып җитә. Аның әкияттәгечә батырлыгын язып бетереп тә булмас. Хезмәттә һәм фронтта бер үзе 3-4 кешелек эшләр башкара, кызу һәм тәвәккәл кеше була. Йөкләмәләрне һәрвакыт “бик яхшы”га үтәгәне өчен аны иптәшләре “Огонёк” дип йөртәләр. Аны батырлыгы, патриотик хисе көчле булган өчен “Кызыл байрак” ордены,  I нче һәм II нче дәрәҗәдәге “Бөек Ватан сугышы” ордены белән бүләклиләр. Шәрифулла карт әтием 1945 елны күкрәгенә алтындай балкып торган орденнар һәм дистәләгән медальләр тагып сугыштан кайтып төшә. Әмма, аның бер аягында ярчык калып, аягын югалта, ул бер кая да йөри алмый.

Бәхетенә, хатыны бик мәрхәмәтле булып чыга. Ул фронтан кайткач, Фәүзия Хәлидуллинага өйләнә. Алар тату гаилә корып 6 бала тәрбияләп, аякка бастыралар. Балалары - Нурзия, Разия, Фәйзулла, Зәйтүнә, Нурханә, Арифулла үзләренең балаларын үстереп, хәзер оныкларына сөенеп яшиләр. Карт әтием турында еламыйча сөйләп булмый иде, залдагы барлык халык аңа баш ия һәм елыйлар иде. Ул авылыбызның иң алдынгы, иң күренекле, зыялы, акыллы, хөрмәтле кешесе булып яшәде. Ул хәзер юк, вафатына берничә ел инде, ләкин аны авылдашлары онытмыйлар, мин дә онытмыйм.

Элина ХИСАМЕТДИНОВА,  Ялутор районы, Яңа Атьял мәктәбенең 8 сыйныф укучысы.