“Урал сандугач”ы җиңүчеләре

Подробности

Опубликовано 01.06.2018 00:00

Просмотров: 561

Екатеринбург шәһәрендә үткән "Урал сандугачы" төбәкара татар җыры фестивалендә өлкәбез талантлары да катнаштылар. Төмән районының Муллаш авылыннан “Пышны” (җитәкчеләре Җәгъфәр Касыймов) һәм Тубылның “Сүзге” (Наҗия Хәкимова) ансамбльләре, Земфира Шәрипова, Ялутордан Әлфия Алимова сынатмадылар. “Пышны” (рәсемдә) һәм “Сүзге” 1 урын алып, гала-концертта катнашып, шатланып кайттылар. Сәләтле кешеләрне һәркайда күрәләр, афәрин, якташларыбыз.

- Монда Татарстан, Башкортостан, Пермь, Чиләбе, Курган, Төмән, Свердловск өлкәләреннән 85 татар җыры һәм инструменталь музыкасын башкаручылар арасында дәрәҗәле жюри әгъзалары: Башкортостан һәм Татарстан Республикалары атказанган артисты Фән Вәлиәхмәтов, Татарстанның атказанган артистлары Рәсим Низамов, Вил Усманов, “Зөләйлә” дуэты чыгышларыбызны югары бәяләвенә бик шат һәм горур. Без фестивальгә 4 чыгыш алып килдек. Аның икесе җыр, гармунда уйнау һәм төйдереп бию иде. 1 урынга себер татар җыры, такмаклар белән чыктык. Егетләр төркеме башкарган “Ямчикәй” җырын аерым видеотасмага төшереп алдылар, Вил Усманов та аны репертуарына кертергә, Муллаш егетләреннән өйрәнүен әйтергә вәгъдә бирде, - дип сөйләде ансамбль әгъзасы Гөлшат Касыймова.

Тубыл балаларының җитәкчеләре Наҗия Хәкимова конкуренция бик зур булуын белдерде. “Екатеринбург Татарстанга якын булганга, анда вокал көчле. 1 урын алырбыз дип уйламаган идек”, - диде. Алар оештыручыларга олы рәхмәтләрен белдерделәр.

Гөлнур ВӘЛИЕВА.