“Балам югалды”

Подробности

Опубликовано 03.03.2017 10:09

Просмотров: 604

- Төмәнгә эшкә дип киткән балам югалып китте. 2 ел була инде. Карточкаларын бөтен дөньяга ябыштырганнар, нәтиҗәсе генә күренми. Шул кайгыдан авырып киттем, катлаулы операция булды. Апамның баласы ул, мин карап үстердем, Байкаловода ветврач хатынга өйләнгән иде. Хатынының ике баласы янына үзенең өченчесе туды, анысына 4 яшь. Аларны ашатырга кирәк. Авылда ферманың ябылуы бик начар булды, мин кечкенәдән - 13 яшьтән 38 ел эшләдем. Башта сыерларны кул белән саудык.

Кайбер кешеләр, күреп калдык, дип сөйлиләр, әллә алдыйлармы? Алар әйткән районны ныклап тикшереп чыгалар, таба алмыйлар. Бәлки, хәтерен югалткандыр. Югала торган көнне кичке унда минем белән телефоннан сөйләште ул. Хәлләребезне сорашты. “Сара апа, килче безгә, монда тула йомыркалар, тушенкалар. Мин “Дружба” ясыйм. Калганнар төскә эшкә киттеләр. Монда үзем генә”, - диде. Шуннан иртәгәсен юкка чыкты да куйды. Алдан хатыны белән сөйләшкән. Боровой поселогы тирәсендә агач кисә иде.

Племянникка - Барый Борисович Давлетшинга 40 яшь иде. Бөтен җирне актарып чыктык, бер кая юк. Фотосын күрсәтәбез. Ике көн алдан күрдек, диләр. Эзлибез, юк. Гадалкаларга бардык. Исән, кайтыр, диләр. Ябык җирдә ул, җылы вакытта кайтыр, диләр. Хатыны Роза: “Ул тере, мин беркемгә дә бармыйм, кайтыр”, - дип ирен көтә.

Бу юлларны безгә Тубыл районының Арткавыл авылында яшәүче Сара апа Рәхимҗанова сөйләгән иде. Бәлки Барыйны очраткан, ул вакыттан соң күргән кешеләр бардыр. Гаиләсе хәбәр көтә, зинһар, гаиләсенә, я редакциягә хәбәр итсәгез иде.

Гөлнур ВӘЛИЕВА.