Ышанычларын акларбыз

Подробности

Опубликовано 17.08.2018 00:00

Просмотров: 619

Укытучы... Кем соң ул? Безнең уебызча, укытучы – ул балаларга аң бирүче, тәрбияче, кинәшче. Укытучы, беренче чиратта ул – бала күңеленә яхшылык, рәхимлек, сафлык орлыкларын салучы.

Без – Руфат Айдуллин, Рушат Нәгыйпов, Рания Садыйкова, Илмар Садыйков, Игнат Сәитов, Эрик Янгучин быел 11нче сыйныфны тәмамладык. Хәзер инде кая укырга керербез дип уйланабыз.

Беренче укытучыларыбыз Нурия Мөхәмәткалы кызы Азанова, Сәкия Сәгади кызы Бәхтиева, Рәкыя Ниязбак кызы Хәлилова – безне, берни белмәгән балаларны, укырга, язарга, санарга, караны актан аерырга өйрәттеләр. Алар бит безгә икенче әни урынына булдылар. Ә инде 5нче сыйныфтан апалар, абыйлар безгә төрле фәннәрдән белем бирделәр. 5-11нче сыйныфларда класс җитәкчебез Гөлшат Тимерхан кызы Турышева һәрвакыт хәлебезне аңлап, безгә ярдәм кулы сузып безне канатландырып, әйдәләп торды.

Апа-абыйлар һәрвакыт безгә ышана, шуның өчен дә аларның ышанычларын акларга тырыштык һәм алда да тырышырбыз. Илебезнең башка мәктәпләрендәге кебек без дә яраткан мәктәп, хөрмәтле укытучыларыбыз белән саубуллаштык. Соңгы кыңгырау, бердәм дәүләт имтиханнар артта калды, чыгарылыш кичәсе дә узып китте. Безгә ныклы белем, тәрбия биргән укытучыларыбызга баш иеп, рәхмәтләребезне белдерәбез. Шулай ук бердәм дәүләт имтиханнарына әзерләгән укытучыларга икеләтә рәхмәтлебез. Болар рус теле һәм әдәбияты укытучысы Алсу Рәхмәтулла кызы Барсукова һәм математика укытучысы Фәридә Хәмит кызы Ишбулаева. Фәридә апа күп еллардан математика фәненнән белем бирә, эш стажы 45 ел. Укучыларга ул киң һәм төпле белем бирә. Ел саен ике классны дәүләт имтиханына әзерли. Уңышлары өчен тапшырылган Мактау грамоталары да чиксез аның, хезмәт ветераны исеменә лаек. Укытучылар һәрвакыт безгә үрнәк. Без аларга авыр, җаваплы хезмәтләрендә уңышлар, сәламәтлек, акыллы, тырыш, тәртипле, актив укучылар телибез. Без аларны бик тә яратабыз.

11нче сыйныф укучылары.
Тубыл районы, Вәчир урта мәктәбе.