Гадәтләрдән котылабыз

Подробности

Опубликовано 06.09.2019 00:00

Просмотров: 610

Соңга калу

Мондый гадәтегез булса, очрашуның тәгаен вакытын билгеләмәгез. Мәсәлән, 10 белән 11 сәгать арасында, дип әйтергә мөмкин. Очрашуга запас вакыт калдырып чыгыгыз. Бәлки, “бөке”дә утырырга яки юлыгызда берәр танышыгыз очрап, сөйләшергә туры килергә мөмкин.

Күп ашау

Өстәлгә бөтен булган ризыкны чыгармагыз. Тиешлесен генә тәлинкәгә салыгыз да шуның белән тукланыгыз. Кеше күңелсезлектән дә күп ашарга мөмкин. Кәефсезлекне башка шөгыль белән басарга тырышыгыз. Төнлә ашау гадәтеннән котылу өчен, диетологлар көндез аксымлы ризыклар (ит, сөт, диңгез ризыклары) белән тукланырга киңәш итә. Ашыйсы килү теләге йокларга ирек бирмәсә, алма яки кишер кабып куярга була.

Оныту һәм югалту

Күпләрнең ачкыч бәйләмен югалта торган гадәте бар. Өй ишеген ачып кергәч, аны кая куйганын белмиләр, аннары озаклап эзлиләр. Шундый хәл булмасын өчен, ачкычны бер җиргә элеп куярга өйрәнегез. Әллә ничә кесәдән акча эзләмәс өчен, аны янчыкта йөртергә күнегегез. Дару, документ, бизәнү әйберләре, чекларны аерым тартмага салырга гадәтләнегез. Шулай аларны табу җайлырак булыр. 

Әгәр оныта торган гадәтегез бар икән, мөһим эшләрне кәгазьгә язып, аны суыткыч ишегенә эләргә мөмкин. Чүпне ташларга кирәк булганда, аны күзегезгә чалынырлык итеп ишек төбенә куегыз. Ишеккә онытырга мөмкин әйберләр исемлеген язып элә аласыз: мәсәлән, телефон, акча, документ, машина ачкычы.