“Сау-сәламәт йөреп кайтыгыз”

Подробности

Опубликовано 25.12.2020 00:00

Просмотров: 428

Бүгенге көндә Индәр авылыбызның өч егете ил каршындагы бурычларын үтәп, армиядә хезмәт итәләр.

Зөфәр Яналиев Калининград шәһәрендә танк гаскәрендә хезмәт итеп, тиздән үз гаиләсенә, әнисе-абыйсы, энекәшләре янына кайтты.

Салават Тимербулатов хәзерге көндә Мәскәү өлкәсендә танкчы буларак хезмәт итә. Җәйгә әтисе-әнисе, энекәшләре янына, Аллаһы боерса, әйләнеп кайта.

Данил Тимербулатов Ярославль өлкәсенең Переславль-Залесский шәһәрендә ракета гаскәрләрендә хезмәт итә. Шулай ук ул да җәй айларына авылыбызга гаиләсенә кайта. Аны әти-әнисе, әби-бабайлары, энекәше, сеңлесе теләкләр теләп көтеп калалар. Ә инде аларны көткән кардәшләренә сабырлык, озын гомер, ныклы сәламәтлек һәм түземлек телисе кала.

Ә менә бу көннәрдә армия сафларына тагын 3 егетне озаттык.

Зөфәр Яналиевның икенче энекәше – Әмир Яналиев. Гаиләдә алар дүрт бертуган, тагын ике энекәшләре вакытлары җитсә, илебезне сакларга китәргә торалар. Әмир Вагайда һөнәри училищеда укып йөргән иде. Килгәч, укуын тәмамлар. Биктимер Тимербулатов Төмәндә укып, үзенә һөнәр алган. Ул 2017 елда укырга кереп, 2 ел 10 ай укып чыкты. Армия сафыннан кайтса, үзенә эш тә табылыр. Зөфәр Гаитов Төмән колледжын уңышлы тәмамлап, автомобиль юллары һәм аэродромнар төзү һәм эксплуатацияләү һөнәре буенча таныклык алып, авылга кайтты. Бу егетләребез дә үз бурычларын үтәп, лаеклы дәрәҗәдә әти-әниләре, әби-бабайлары, эне-сеңелкәшләренә үрнәк булып, сау-сәламәт әйләнеп авылыбызга кайтырлар, Аллаһы Тәгалә боерса.

Тания АЙБАТОВА,
Вагай районы, Индәр авылы