Курск дугасында һәлак була

Подробности

Опубликовано 24.04.2020 00:00

Просмотров: 494

Гатаулла Гафият улы Сәгыйтов 1903 елда Татарстан Республикасы, Апас районы, Ындырчы авылында туган. 1921 елда Сәгыйтовлар гаиләсе Себергә юл тота һәм Омск өлкәсе, Байкал районы, Кызыл Яр авылында урнаша. 30 нчы елларда Гатаулла үсеп җитеп, Зәкирә исемле кыз белән никахлашып, ике егет тәрбияләп үстерәләр.

Сугыш башланганчы Гатаулла сельпода, потребкооперативта хезмәт итә. Бөек Ватан сугышы башлангач, 1941 елның азагында үзе теләп сугышка китә. 1942 елның ахырында Сталинград бәрелешендә Себердә оештырылган дивизия (Сибирская дивизия, бәлки 308нче) сафында, немецларның фельдмаршал Паулюс җитәкләгән армиясен тар-мар итүдә катнаша, ахырда ошбу фашист армиясе җитәкчесе белән кулга алына. Гатауллага әле тагын да күпләгән каты сугышларда катнашырга туры килә. Тарих битләреннән укып яхшы беләбез - 1943 елның эссе көннәре, Курск дугасында Прохоровка авылы янында ике яктан да бер берсенә каршы 1200 танк бәрелешә, коточкыч хәл - тирә-як, бөтен җир яна, туплар шартлый. Ошбу сугышта Гатаулла Ватаны-халкы өчен геройларча һәлак була. Аллаһы Тәгаләнең рәхмәтендә булсын.

Мәрхүмнең бер баласы Сафуан абый лаеклы ялга чыгып, күп еллар Төмән районы, Индрәй авылында яшәде, авыл мәчетендә имам вазыйфасын алып барды. Яңа мәчет төзелешендә ярдәм йөзеннән 125 мең сум акча бирде, аңа кадәр хатыны Сәрвәр апа белән Казанга барганында Зәңгәр мәчет төзегәндә 320 мең сум ярдәмен – садакасын калдырган иде. 85 яшендә вафат булды. Авыр туфрагы җиңел, кабере якты булсын.

Фатыйх ГАРИФУЛЛИН, Төмән шәһәре.