Июль 2026 |
Мөрәҗәгать итү һәм котлаулар бирү өчен электрон адрес:
janartat@inbox.ru,
телефон:
8 (3452) 69-57-60.
Добраться до нас можно на автобусах:
6, 32, 34, 37, 48, 51, 65, 69, 77, 78, 135к, 135м
(остановка «Автоколонна №-1228», «Школа №-39»)
Тюмень, ул. Шишкова, 6, 2 этаж, Тюменский издательский дом
Төмәннең Җәмигъ мәчетендә өлкә мөселман дини идарәсе оештырган Корбан бәйрәме үтте. Бу изге көндә йөзләгән мөселман чын күңелдән шатлык, юмартлык һәм рухи бердәмлек атмосферасында берләште.
Бер якта ир-егетләр зур казаннарда җирле мөселман оешмасы җитәкчесе Әмир хәзрәт Галеев чалган корбанлык иттән пылау пешергәндә, Яңавылның дус халкы чәй өстәленә тәм-том алып килде, аларны «Нур» хатын-кызлар оешмасы кызлары һәм Әлмирә ханым Гомәрова җитәкчелегендәге команда матурлап өстәлләргә урнаштыра да барды.
Бәйрәм мәйданчыгында һәр кунак өчен күңелле һәм файдалы интерактив зоналар эшләде: һәр теләүче ислам тарихы һәм гореф-гадәтләрен, татар телен белүдә үз көчен сынап карый алды; иҗат мәйданчыгында «Этнос» үзәге хезмәткәрләре балалар һәм өлкәннәр өчен бик кызыклы мастер-класслар оештырдылар. Кунаклар үз куллары белән милли бизәкле тәлинкәләр ясадылар һәм бәйрәм символын – бәрәнне бизәделәр.
Балалар батутларда сикерделәр, паровозга утырып йөрделәр, бер якта дини тауарлар белән сатучылар эшләде.
Оештыручылар тирән дини гореф-гадәтләрне заманча гаилә фестивале форматына оста берләштерделәр. Бу бәйрәм көне чын кунакчыллык, бердәмлек һәм бөек мәдәни хәзинәләребезне саклауның якты үрнәге булды.
Ә үзәктәге сәхнәдә изге Коръәннән сүрәләр, тәбрикләүләр яңгырады, тырышлар бүләкләнде, якшәмбе мәктәбе кызлары сәләтләрен күрсәттеләр. Төмән өлкәсе мөселманнарының Диния нәзарәте җитәкчесе мөфти Зиннәт хәзрәт Садыйков Корбан бәйрәменең асылы турында сөйләде. «Корбан бәйрәменең асылы - әҗәт гамәлдән тыш, фидакарьлек, тугрылык, Аллаһка якынаю, ул безне бердәмлеккә, юмартлыкка һәм ярдәмләшүгә өйрәтә. Ислам — кешелекле дин, мәхәббәт дине, дуслык дине, тотрыклылыкка алып баручы кешеләр арасында мөнәсәбәтләр дине. Менә Исламның төп юнәлеше нәкъ шушылар. Болар барыбызны да берләштерә. Бүгенге көндә җәмгыятебезгә дә нәкъ менә шушы бердәмлек кирәк. Президентыбызның быелгы елны Халыклар бердәмлеге елы дип игълан итүе дә юкка түгел», - диде ул.
Мөфтиебез сүзләрен раслап, Россия Герое Рөстәм Сәйфуллин да чыгышында бердәмлек турында сөйләде: «Безнең ил күпмилләтле, күпконфессияле. Илебездә 194 милләт вәкиле яши. Һәм махсус хәрби операция катнашучысы буларак әйтәм: төрле милләтләр вәкилләре окопта бергә безнең чикләребезне саклый, барлык куелган бурычларны бергәләп үти. Безнең илдә шундый тәртип: православие бәйрәмнәрен дә, мөселман бәйрәмнәрен дә бергәләп билгеләп үтәбез. Сугыш нокталарында беркайчан да зәңгәр канлы кешене күргәнем юк, кан барысында да кызыл төстә. Һәм менә бу бәйрәмнәр, шул исәптән диндарлык та, безне берләштерә. Көнбатыш безнең ил эченә таркаулык кертү өчен ничек кенә тырышса да, алардан бернәрсә дә чыкмас. Барыгызны да бәйрәм белән котлыйм, барыбызга да тизрәк Җиңү һәм безнең кардәшләребезнең, ирләребезнең, улларыбызның тизрәк өйләренә кайтуын телим».
Бәйрәм аш өстәле артында дәвам итте. Рәхмәтле кунаклар изге теләкләр белән таралыштылар.
Гөлнур ВӘЛИЕВА.
Рәсемнәрдә: Корбан бәйрәмендә.
