Төмән районы гаиләләре бер-берсенә мәхәббәт һәм хөрмәт үрнәге

Подробности

Опубликовано 21.06.2024 04:28

Просмотров: 444

Төмәндә «Ел гаиләсе–2024» Бөтенроссия конкурсының муниципаль этабы тәмамланды. Җиңүчеләрне һәм призерларны бүләкләү тантанасы «Гаилә» төбәк үзәгендә узды. Быел конкурска 20 гаиләдән 23 гариза килгән, өч гаилә берничә номинациядә катнашкан.

Төмән районыннан биш конкурсант барлык номинацияләрдә иң яхшылар исемлегенә керде: «Авыл гаиләсе» номинациясендә Марковичлар гаиләсе җиңде, «Күп балалы гаилә» номинациясендә Мищериннар гаиләсе көмеш призер булдылар. «Традицияләрне саклаучы гаилә» номинациясендә икенче урынны - Туртаевлар, өченче урынны Бабшановлар гаиләсе алды, «Яшь гаилә» номинациясендә өченче урынга Исхаковлар гаиләсе чыкты.

Конкурста катнашучы актив Бабшановлар гаиләсе газета укучыларыбызга таныш.

Төмән районы, Муллаш авылыннан Бабшановлар гаиләсе традицион кыйммәтләрне формалаштыруга керткән өлеше өчен өлкәдә танылдылар. Алар Бөтенроссия фестиваленең муниципаль этабы призерлары булдылар. Илгиз Мансур улы һәм Гөлфия Сәлимчан кызы бер кыз һәм бер егет тәрбиялиләр, алар «Төмән районының супер-гаиләсе» район конкурсында, балык тоту спорты буенча ярышларда, район чараларында һәм халык иҗаты конкурсларында, «Дуслык күпере», «Искер жыены» фестивальләрендә актив катнашалар. Гөлфия Сәлимчан кызы «Мин әни-2020» беренче ачык милли конкурсында җиңүче дә.

«Балаларда җаваплылык һәм мөстәкыйльлек тәрбияләү - катлаулы, әмма, мөһим процесс. Чөнки балалар бу сыйфатларга ия булсалар гына, киләчәктә булачак проблемаларны уңышлы хәл итә алачак. Тәрбия яшендә иң мөһиме - шәхси үрнәк күрсәтү.

Эшләрне планлаштырырга һәм максатлар куярга, үз вакытыңны нәтиҗәле кулланырга өйрәнү өчен мөһим күнекмәләр ярдәм итәчәк.

Үз максатларыңны билгеләргә һәм аларга ирешү планнарын төзергә ярдәм итү. Бу максатчанлыкны һәм түземлелекне үстерергә ярдәм итәчәк.

Карарлар кабул итү һәм үз гамәлләрең өчен җаваплылык алу мөмкинлеге бирү. Алар беренче тапкыр килеп чыкмаса да, төрле ситуацияләрне үзләре аңларга өйрәнсеннәр», - дип «ВКонтакте» челтәренең шәхси битендә балаларны тәрбияләү ысуллары белән уртаклаша Гөлфия Бабшанова.

Шулай ук Төмән районы гаиләләре арасында Бабшановлар Бөтенроссия «Бөтен гаилә» проектында да катнашып өлгергәннәр, конкурсның һәрбер биремнәрен актив башкарганнар.

«Әгәр дә сүз гаилә, гомумән, башка конкурслар турында барса да, без катнашырга тырышабыз. Гаилә елында шундый күркәм конкурска кушылырга булдык. Конкурсны «Вконтакте» төркемендә күреп, шунда ук теркәлү уздым», - дип сөйләде Гөлфия Бабшанова.

Россия Президенты Владимир Путин игълан иткән Гаилә елына багышланган «Бөтен гаилә» Бөтенроссия проектында Төмән өлкәсендә яшәүче бик күп гаиләләр катнашырга теләк белдергәннәр. Алар барысы да вакытларын бергәләп актив үткәргәннәр һәм махсус биремнәрне үтәгәннәр.

Конкурста катнашучыларның күбесе проект чыннан да гаиләләрне уртак шөгыль астында якынайтырга ярдәм итә дип ышандыра.

Конкурс ахырында «Бөтен гаилә» проектында актив катнашканнары, үзләренең уникаль традицияләрен саклап, традицион гаилә кыйммәтләрен ныгытканнары һәм алга этәргәннәре өчен Бабшановларны гаилә сертификаты белән бүләкләгәннәр.

Конкурста катнашучы ике кызның әнисе Ләйсән Усманова билгеләп үткәнчә, аның гаиләсе биремнәрне үтәргә һәм күбрәк бергә вакыт үткәрергә ярата. Конкурс вакытында алар бергәләп китап укыганнар, бөтен гаиләләре белән пилмән әзерләгәннәр, чыршы бизәгәннәр, ә аннары Яңа елны каршылаганнар. Ә бергәләп вакыт үткәрү фоторәсемнәрен, конкурс шартлары буенча, «ВКонтакте» һәм «Одноклассники» социаль челтәрләрендә урнаштырганнар.

Ләйлә МАДЬЯРОВА.
Рәсемдә: Гөлфия Бабшанова кызы Илүзә белән.