Горурлыгыбыз

Подробности

Опубликовано 09.08.2024 20:26

Просмотров: 197

Төмән шәһәренең 52 нче мәктәбе директоры Алевтина Манкаева «Россиянең ел директоры» Бөтенроссия һөнәри конкурсының финалына чыкты. 8 июльдә конкурсның рәсми сайтында 23 сентябрьдән 5 октябрьгә кадәр йомгаклау этабында катнашачак 30 финалчы исемлеге басылды.

Алевтина Зиннәтулла кызы сайлап алу турының конкурс сынауларын уңышлы узды.

Газетабызның 29 марттагы 13 нче санында танылган директорның шәһәр этабында «Ел директоры» номинациясендә җиңеп, финалга юллама алуы турында язган идек. Аннары ул өлкә турында уңышлы катнашып, ил күләмендәге ярышта үзен сынап карау мөмкинлеге алды. Һәм менә тагын Алевтина Манкаеваның уңышлары белән шатланабыз.

«Алевтина Зиннәтулла кызын чираттагы уңышы белән котлыйм! «Төмән өлкәсенең ел педагогы» конкурсында аның якты һәм компетентлы чыгышларын хәтерлим. Бу номинациядә жюри рәисе буларак, без иң яхшы директорны сайладык дип әйтә алам. Алевтина Манкаева - эше тормыш мәгънәсенә әверелгән кеше, аңа хезмәт итү - ул көн саен фидакарьлек, якын кешеләргә карата мәхәббәт һәм хөрмәт, иң яхшы карарларны даими эзләү һәм балаларга һәм аларның ата-аналарына эчкерсез ярдәм итү. Бу очракта җиңү - хезмәт өчен тиешле бүләк. Шулай булачагына ышанабыз!» - дип язган ТОГИРРО ректоры Вера Соловьева үзенең ТГ-каналында.

Йомгаклау этабының беренче туры Калуга өлкәсендә узачак. Катнашучыларны «Хәрәкәт траекториясе» һәм «Әйе һәм Каршы» конкурс сынаулары көтә.

Иң күп балл җыйган биш лауреат Мәскәү өлкәсендә узачак икенче турга үтә. Аларга үзләренең һөнәри осталыкларын «Мастер-класс», «Брифинг» һәм «Блиц-турнир» сынауларында күрсәтергә туры киләчәк. Бу этапта катнашучыларны дүрт төркемнән торган жюри бәяли: зур жюри (экспертлар), укучылар, студентлар һәм ата-аналар.

Рейтинг исемлегендә икенче һәм өченче урыннарны алучылар «Россиянең ел директоры» Бөтенроссия конкурсы призерлары дип игълан ителә. Иң күп балл җыйган катнашучы конкурста җиңүче була. Аның исеме 5 октябрьдә Дәүләт Кремль сараенда тантаналы рәвештә игълан ителәчәк.

Өстәвенә, өч елдан да ким булмаган эш стажы булган мәгариф оешмалары җитәкчеләре Россия мәгариф министрлыгы оештырган ел саен үткәрелә торган «Россиянең ел директоры» Бөтенроссия һөнәри конкурсында катнаша ала.

Алевтина Зиннәтулла кызы – 36 ел педагогик эш стажы булган, Россиянең гомуми белем бирү мактаулы хезмәткәре, гомуми белем бирүдәге казанышлары өчен Татарстан Республикасы медале белән бүләкләнгән эзләнүчән шәхес. 1999 елдан Төмән шәһәренең 52 нче урта гомуми белем бирү мәктәбе директоры. Төмән шәһәрендәге этномәдәни компонентлы бердәнбер мәктәп ул.

Ул 1992 елда Д.И.Менделеев исемендәге Тубыл дәүләт педагогия институтын тәмамлый, биология укытучысы белгечлеге алып чыга. 2016 елда Төмән дәүләт университетының «Мәгариф системасында менеджер» белгечлеге буенча дипломына лаек була.

Педагогик эшчәнлеге дәвамында гел үз-үзен үстерү, өстәмә белем алу белән шөгыльләнә. «Минем өчен иң кызыклысы - этномәдәни һәм табигый фән юнәлешләре», - ди ул.

Алевтина Зиннәтулла кызын укучыларның көндәлек һәм шәхес буларак үсеше җәлеп итә һәм илһамландыра. Балаларда киләчәктә үз тормышларында уңыш баскычларын төзергә, үз рухи нигезләрен булдырырга мөмкинлек бирүче күнекмәләр формалаштыруны төп максат дип саный.

Хөрмәтле директорыбызны өлкә данын уңышлы яклавы белән тәбриклибез һәм соңгы ярышларда уңышлар телибез.

Гөлнур ВӘЛИЕВА.