Шыкча, Ямбай «Геройлар йөзе» проектына кушылды

Подробности

Опубликовано 13.09.2024 17:29

Просмотров: 146

Төмән районы мәктәпләрендә тантаналы рәвештә каһарманнарга багышланган баннерлар ачылды.

Герой-фронтчы, педагог портреты Шыкча мәктәбе фасадында урнаштырылды. Хәбибулла Якин бу мәктәпкә 20 елдан артык гомерен, балаларга тәрбия биргән.

Төмән өлкә Думасы рәисенең беренче урынбасары, «Бердәм Россия» партиясенең «Яңа мәктәп» проектының төбәк координаторы Андрей Артюхов: «Миңа Хәбибулла Хәйрулла улы белән таныш булуыма бәхетеле. Ул миңа 2001 елда үзенең «Шел солдат к Победе» дигән китабын бүләк итте, бүген мәктәп музеенда да шундый ук китапны күрдем. «Бердәм Россия» һәм РФ мәгариф министрлыгының «Геройлар йөзе» уртак проекты кысаларында мәгариф учреждениеләре Бөек Ватан сугышы Геройлары, хәрби хәрәкәтләрдә катнашучылар һәм хезмәт ветераннары портретларын урнаштыралар», - дип сөйләде.

Мәктәп музеенда экспонатларның бер өлеше Хәбибулла Якин тормышы турында сөйли. Укытучы булып ул сугышка кадәр үк эшли башлый, 1942 елның январенда аны армиягә алалар һәм җәй көне үк якташыбыз Ржев янындагы Көнбатыш фронтындагы канкойгыч сугышларда катнаша. Контузияләнү һәм яралануга карамастан, ул яңадан сафка баса. Җиңүне Чехословакия башкаласы Прага шәһәрендә каршылый, 1946 елда демобилизацияләнә. Батырлыгы өчен ул 1 нче, 2 нче һәм 3 нче дәрәҗәдәге «Дан орден»нары, 1 нче дәрәҗәдәге «Ватан сугышы ордены», ике «Кызыл Йолдыз ордены», медальләр белән бүләкләнә, алар арасында «Батырлык өчен» медале дә бар. Хәбибулла Якин сугыштан соңгы елларын балаларга белем бирү эшенә багышлый. Рус теле һәм әдәбияты укытучысының хезмәт биографиясе Төмән районы мәктәпләре белән бәйле була. Ул Кыштунлыда, Акъярда, Ямбайда, ике дистә елдан артык Шыкча мәктәбендә хезмәт итә.

Төмән муниципаль районы башлыгы Ольга Зимина үзенең чыгышында: «Бердәм Россия» партиясенең «Геройлар йөзе» проектының районда актив тормышка ашырылуын ассызыклады: «Беренче уку көнендә Княжево һәм Ямбай авылларында баннерлар ачылды. Княжевода Совет космонавты Георгий Береговой, Ямбайда – Советлар Союзы Герое Әхмәдрәшит Аширбәков сурәтләре төшерелгән баннерлар барлыкка килде. Танылган якташларыбыз портретларын без мәктәп фасадларына һәм эчләренә урнаштырабыз - бу әхлакый һәм рухи ориентир, Ватанга чын мәхәббәт үрнәге», - диде. Шыкча укучыларын махсус хәрби операциядә катнашучы Самат Зәйнуллин сәламләде: «Сез - илебезнең киләчәге, шуңа күрә хәзер үк укуга тулы җаваплылык белән карарга кирәк. Кече Ватаныгызны, үз төбәгегезне, илебезне яратыгыз», - диде сугышчы.

Шунысын да билгеләп үтәргә кирәк, Андрей Артюхов мәктәп китапханәсенә «Бердәм Россия» партиясе тарафыннан нәшер ителгән шигырьләр җыентыгының берничә данәсен тапшырды. Төмән өлкә Думасы рәисе Фуат Сәйфетдинов җитәкчелегендә мәктәп укучылары арасында махсус хәрби операциядә катнашучыларга багышланган шигырьләр конкурсы узды, Иң яхшы эшләр җыентыкка кертелде. Ул, сугышчылар аны үзләре белән йөртә алсын өчен. зур булмаган форматта чыгарылган. Хәрбиләрнең фикерләренә караганда, шигырьләр аларга ошаган.

Беренче уку көнне Советлар Союзы Герое Әхмәтрәшит Аширбәков исемен йөртүче Ямбай мәктәбе фасадында да «Бердәм Россия» партиясе гамәлгә ашыра торган «Геройлар йөзе» проекты кысаларында Герой сурәте урнаштырылды. Баннерда мобиль җайланмалар өчен QR-код сурәтләнгән, аны сканерлап, интернет киңлегендә теләсә кайсы кеше Герой турында тулы мәгълүмат таба алачак.

Төмән өлкәсендә «Геройлар йөзе» проекты 19 июльдә старт алды. Беренчеләрдән булып Советлар Союзы Герое, армия генералы Иван Федюнинскийга багышланган баннер барлыкка килде. Ул Төмән шәһәренең 69 нчы мәктәбе фасадында урнаштырылды. Проектка төбәкнең барлык мәгариф учреждениеләре дә кушылыр дип планлаштырыла.

Ләйлә МАДЬЯРОВА.
Рәсемнәрдә: Хәбибулла Якин һәм Әхмәдрәшит Аширбәковка багышланган баннерлар.