Ата-ана даны медаленә лаек гаилә

Подробности

Опубликовано 30.10.2026 08:49

Просмотров: 52

Россия Президенты Владимир Путин Тубыл шәһәрендә яшәүче Хәлиловлар гаиләсен «Ата-ана даны» ордены медале белән бүләкләү турындагы указга кул куйды. Гаилә институтын ныгытудагы казанышлары һәм балаларга лаеклы тәрбия биргәннәре өчен Эльмира һәм Фәнис Хәлиловлар әлеге дәүләт бүләгенә лаек булдылар. Бу хакта Төмән өлкәсе хөкүмәтенең мәгълүмат үзәге хәбәр итә.

Гаиләнең бергә гомер итүләренә 20 елдан артык. Аларның гаилә нигезендә — үзара ярдәмләшү, уртак кыйммәтләр, нәсел тарихына хөрмәт һәм буыннар чылбыры ята. Әти-әни дүрт улларының һәркайсына үз сәләтләрен ачарга, мөстәкыйль шәхес булып үсәргә мөмкинлек тудыра.

Шул уңайдан, Хәлиловлар тәрбияләүне хезмәт эшчәнлеге белән дә уңышлы берләштерә. Эльмира юридик затлар белән эшләү бүлегендә 1 нче категорияле белгеч булып хезмәт куя, ә Фәнис Тубыл электр челтәрләрендә мастер булып эшли. Икесе дә намуслы хезмәтләре өчен рәхмәт хатлары һәм дипломнар белән бүләкләнгән, Фәнис исә һөнәри осталык конкурсларында даими катнашып тора.

Өлкән уллары Денис Тубыл индустриаль институтының 1 нче курсында бюджет нигезендә «Органик матдәләрнең химик технологиясе» белгечлеге буенча белем ала. Ул йөзү буенча 3 нче өлкәннәр разрядлы спортчы һәм ГТОның бронза билгесе иясе. Егет «Шанс» һәм «Искра» отрядларында волонтерлык белән актив шөгыльләнә, патриотик акцияләрдә катнаша һәм махсус хәрби операциядә катнашучы сугышчыларга ярдәм итә.

Данис 2026 елда мәктәпне тәмамлап, хәзерге вакытта Тубыл күппрофильле техникумында «Җиһазларны ремонтлау һәм техник хезмәт күрсәтү буенча электромонтер» белгечлеген үзләштерә. Йөзү белән бик яратып шөгыльләнә: 1 нче яшүсмерләр разряды һәм II баскыч ГТОның көмеш билгесе бар. Ул ел саен «Милләтләр кроссы» һәм «Россия чаңгы юлы» кебек массакүләм спорт чараларында катнаша.

Гаиләнең өченче улы Артем 3 нче сыйныфта укый. Ул Александр Алябьев исемендәге балалар сәнгать мәктәбенең нәфис сәнгать бүлегенә һәм «Молодость» спорт мәктәбенә йөри. ГТОның бронза билгесе иясе.

Кече уллары Эмиль исә быел 1 нче сыйныфка укырга керде. Ул рәсем ясарга ярата һәм абыйлары үрнәгендә төрле бәйгеләрдә һәм спорт чараларында теләп катнаша.

Хәлиловлар, гомумән, бик актив тормыш алып баручы гаилә. 2025 елда алар Ватанны саклаучылар елына багышланган гаилә патриотик марафонында катнаштылар, шулай ук «Ел гаиләсе-2025» Бөтенроссия конкурсында мактаулы икенче урынны яуладылар.

Моннан тыш, Хәлиловлар гаиләсе Тубыл шәһәренең күпбалалы гаиләләр берләшмәсе булган «Отрада» иҗтимагый оешмасында тора. Алар хәйрия акцияләрендә даими катнаша, «Право на жизнь» хайваннарга ярдәм итү үзәгенә булыша һәм хәрби хезмәткәрләр өчен гуманитар ярдәм җыюда активлык күрсәтә.

Ләйлә МАДЬЯРОВА.
(Фоторәсем гаилә архивыннан алынды).