«Безнең көч - бердәмлектә»

Подробности

Опубликовано 20.11.2025 11:20

Просмотров: 169

Яңа Уренгойда «Урал патриотлары» IV форумы узды. Анда Россиянең 12 төбәгеннән 250 волонтер һәм гражданлык активистлары җыелды. Катнашучыларның күпчелеге - Урал федераль округы төбәкләреннән махсус хәрби операция активистлары һәм ветераннары. Ике көн дәвамында катнашучылар иң яхшы практикалар белән алыштылар һәм белем бирү сессияләрендә катнаштылар.

- Проектның төп максаты - Россиянең төрле төбәкләреннән килгән волонтерларны таныштыру һәм берләштерү. Кырда берүзе - сугышчы түгел, дип юкка гына әйтмиләр. Без бердәм булганда, без җиңелмәбез! Безнең көч - бердәмлектә, - диде форумның төп пленар сессиясендә РФ Президентының Урал Федераль округындагы тулы вәкаләтле вәкиле Артем Жога.

Катнашучылар яшьләргә патриотик тәрбия бирү, шулай ук МХО ветераннарына һәм аларның якыннарына ярдәм итү мәсьәләләре буенча фикер алыштылар. Активистлардан бу бик мөһим темалар буенча конкрет тәкъдимнәр һәм яңа идеяләр көтеп калалар.

«Урал патриотлары» IV форумы эшенә йомгак ясау кысаларында округның волонтерларын һәм гражданлык активистларын бүләкләү чарасы узды.

Артем Жога ураллыларга алгы сызыкта хәрби бурычларын үтәүче хәрбиләргә, аларның якыннарына, яңа һәм чик буе территорияләрендә яшәүчеләргә зур өлеш керткәннәре өчен рәхмәт белдерде.

Махсус хәрби операциядә катнашучыларга һәм аларның гаиләләренә ярдәм күрсәтүдә зур өлеш керткәне өчен РФ Президентының Урал Федераль округының тулы вәкаләтле вәкиленең Рәхмәт хаты белән Нуретдин Ибраһимов җитәкчелегендәге «Төмән өлкәсе чик сакчылары ветераннары» иҗтимагый оешмасы коллективы бүләкләнде.

Нуретдин Ибраһимов җитәкчелегендә өлкәбезнең төрле почмакларыннан хөкүмәт вәкилләре, эшмәкәрләр, волонтерлар, иҗтимагый оешмалар ярдәме белән әзерләнгән гуманитар йөк махсус хәрби операция зонасына ел саен озатылып тора. 

Ләйлә МАДЬЯРОВА.