Моңлы һәм дәртле Себер моңнары

Подробности

Опубликовано 10.03.2023 06:00

Просмотров: 213

«Төзүче» милләтләр мәдәнияте йортының татар бүлеге җитәкчесе Гөлнара Кәримова Төмән тамашачысын матур концерт программасы белән кабат сөендерде. Концерт өлкәдә барган татар мәдәнияте көннәре кысаларында узды. Моңлы курай тавышы белән башланып киткән чара «Себер моңнары» дип юкка гына аталмаган икән. Биредә шәһәрнең күренекле җырчылары һәм җыр-бию төркемнәре белән беррәттә яшь йолдызчыклар да чыгыш ясадылар. Чараны ике телдә Гөлнара Кәримова белән Хәлил Вагайлы алып бардылар.

Алар тамашачыларны бәйрәм белән котлап, күңелле ял теләделәр. Үзешчән шагыйрь артистларның һәрберсенә багышлап язган дүртьюллыкларын укып ишеттерә барды. Тамашаны «Бәйрәм» (җитәкчесе Г.Кәримова) балалар җыр ансамбле «Туган телдә җырыбыз» дигән җыр белән ачып җибәрде. Җанга үтеп керерлек моңлы җырларын Найлә Габдуллина, Гөлнара Кәримова, Айдар Кормандаев, Рөстәм Итоняков башкардылар. Зур сәхнәгә Азалия Алиева, «Илһам» (Г.Шәмсетдинова) бию ансамбле беренче адымнарын ясап, тамашачылар мәхәббәтен яуладылар. Ришат Акбалин курайда оста итеп уйнады, хатыны Айгөл Акбалина матур башкорт биюе белән тамашачыларны таң калдырды. «Ихлас» (Н.Нигъмәтуллина), «Угрылыш» (М.Хәйруллина) фольклор ансамбльләре иң матур номерларын бүләк иттеләр. «Пышны» (Җ.Касыймов) фольклор ансамбле сәхнәне дер селкетеп биеп, «Әхтәмүшкәләр» (Ә.Назыров) халык җыр ансамбле дәртле җырларын башкарып, тамашачыларның көчле алкышларын яуладылар. Концерт җанлы һәм күңелле барды, тамашачылар күңелендә матур хисләр һәм яхшы кәеф калдырды.

Рәүфә КАНГАЗИНА