«Бу җиңү сезнеке дә!»

Подробности

Опубликовано 14.02.2025 19:39

Просмотров: 207

Төмән районында «1941-1945 еллардагы Бөек Ватан сугышында Җиңүнең 80 еллыгы»на багышланган медальләрне тапшыру башланды. Аларны 142 ветеран алачак. Беренче сигез юбилей медален тапшырырга Горьковка, Московский, Ямбай, Каменский, Яңа Тарман, Успенка авыл җирлекләреннән хезмәт фронтында катнашучыларны «Родник» мәдәният һәм ял үзәгенә чакырдылар.

93 яшьтән 97 яшькә кадәр булган әби-бабайларның язмышлары гаҗәеп охшаш. Әтиләре һәм абыйлары фронтка киткән, ә алар балачактан кырларда, фермаларда эшләгәннәр, печән чабуда, агач әзерләүдә катнашканнар.

Турай авылында яшәүче Газизулла Мөхәммәдиев сугыш башланганда 4 нче сыйныфта укый. Әтисенең үлгән хәбәре килгәч, ирләр эшен аңа 9 яшьтән башкарырга туры килә. «Хәзер 9 яшьлек баланы эшләргә мәҗбүр итү кызганыч, чөнки ул әле - бала! Ә безне кызганмадылар, без дә үзебезне кызганмадык. Сугыш!» - дип сөйли ул. Хәзер ветеранның 15 оныгы һәм оныкчыгы бар. «Мин - бай бабай!» - ди ул үзе турында горурланып.

Ветераннарның язмышлары охшашлыгы, алар кичергән авырлыклар, буыннар дәвамчанлыгы турында сөйләп, Төмән районы башлыгы Ольга Зимина һәм Төмән, Түбән Тәүде, Яркәү районнары хәрби комиссары Алексей Музалевский бүләкләр тапшырдылар. Төмән районы Думасы рәисе Валентин Клименко, район ветераннар советы рәисе Татьяна Вавилова, Горьковка авылы яшь армиячесе Юлия Терентьева тыл хезмәтчәннәренә рәхмәт сүзләре белән мөрәҗәгать иттеләр. Сәхнәдән матур җырлар яңгырады, чара чәй эчү белән тәмамланды, анда ветераннар күптән үткән, беркайчан да онытылмый торган еллар турындагы истәлекләре белән уртаклаштылар.

Февраль ахырына кадәр Төмән районында барлыгы 142 юбилей медале тапшырылачак. Олы яшьтә булуларын һәм ветераннарның сәламәтлекләрен исәпкә алып, бүләкләү өйдә, туганнары һәм якыннары янында узачак.

«Төмән районы яңалыклары» төркеменнән алынды.
(Ләйлә Мадъярова тәрҗемәсе).