Шәһәр Сабантуе

Подробности

Опубликовано 02.08.2017 16:20

Просмотров: 309

29 июль көнне, Шәһәр көне уңаеннан, татар мәдәният үзәге тырышлыгы белән оештырылган чираттагы шәһәр Сабантуе Заречный микрорайонының ял итү зонасында җырлар һәм биюләр, спорт ярышлары белән үтте.

Сабантуйны алып баручылар – татар мәдәният үзәге хезмәткәре Зөлфинә Минибаева һәм Зинар Кәримов шәһәребезнең туган көне һәм милли бәйрәмебез белән котлап, сәхнә түренә хөрмәтле кунаклар – шәһәр башлыгы Александр Моор һәм Татарстан кунагы – Баулы районының башлыгы Рамил Гатиятуллинны чакырдылар.

Алар бирегә килүчеләрне тәбрикләп күтәренке кәеф, илебезгә тынычлык, татулык теләделәр. Р.Гатиятуллин     мондагы күпмилләтле халыкның дус-тату яшәвен әйтеп, Сабантуй бәйрәмен югары дәрәҗәдә оештырулары өчен олы рәхмәтен белдерде.

Рәсми өлештән соң, мәйданның төрле почмакларында милли уеннар, гер күтәрү, көрәш, армрестлинг кебек ярышлар оештырылган иде. Балалар мәйданчыгында нәниләр, яшьләр мавыктыргыч уеннарда бик теләп катнаштылар. Сәхнәдән матур концерт программасы күрсәтелде. Татар мәдәният үзәге, шәһәребезнең сәнгать осталарының, Татарстан артистларының матур концерт программасын карап тамашачылар чын күңелдән ял иттеләр. Көнозын сату рәтләре эшләп торды, милли татар ашлары, шашлык, пылау, кайнар чәйләр белән дә сыйланырга булды.

Өлкәбездәге үткәрелгән быелгы Сабантуйлар марафонының соңгысы – шәһәр Сабан туе оешкан төстә үтте. Концерт тәмамлангач та, бирегә килүчеләр кайтырга ашыкмадылар, мәйданның төрле почмакларына таралып чирәмдә озак сөйләшеп-көлешеп утырдылар.

(Тулырак мәгълүматны “Яңарыш” битләреннән укырсыз).

Нәсимә ТАШБУЛАТОВА.