Ветераннарны котладылар

Подробности

Опубликовано 15.05.2018 17:34

Просмотров: 529

11 май көнне Төмән шәһәр татар мәдәният үзәгендә “Туктамыйча яңгырап торсын, Җиңү хөрмәтенә салют” дигән бәйрәм чарасы узды. Бирегә Төмән шәһәр Думасы депутаты Юрий Баранчук 8нче сайлау округында яшәүче тыл һәм хезмәт ветераннарын җыеп, Җиңү көне белән тәбрикләде һәм, форсаттан файдаланып, үзенең сайлаучылары каршында башкарган эшләре буенча отчет ясады. Депутат соңгы 5 ел эчендә тузган йортта яшәгән биш йөзгә якын кеше яңа фатирлы булганы, күпләргә яшәгән йортларын законлаштырырга ярдәм ителгәне, тиздән елга аръягындагы урамнарда җәяү йөрүчеләр өчен махсус юллар ясалачагы, сүтелгән 11нче мәктәп бинасы урынын төзекләндереләчәге турында әйтте.

Шулай ук ул ветераннарны кызыксындырган, борчыган сорауларга да җавап бирде. Юрий Александрович: “Бүгенге көндә мич белән җылытыла торган бер йорт та калмады. Киләсе 3 елда автобусларда бушлай йөрү чикләнмәячәк. Урамдагы хуҗасыз йөргән этләр белән тагын ничек итеп көрәшергә? Аларны тотып стерилизациялиләр, әмма, күрәсең, шәһәр урамнарына яңа сукбайлар чыга торалар”, - дип аңлатмалар да кертте. Шулай ук ул юбилярларны, җәмәгать эшендә актив катнашучыларны шәхсән котлады һәм һәр ветеранга бүләкләр тапшырды. Ветераннар өчен тагын бер зур бүләк әзерләнгән иде – “Заречная околица” (җитәкчесе Ә.Назыйров) җыр, “Россияночка” (А.Лутошкина) халык ансамбльләре матур концерт куйдылар.

(Тулырак мәгълүматны “Яңарыш” газетасы битләрендә укырсыз).

Рәүфә КАНГАЗИНА.