Игътибар – яшәргә көч бирә

Подробности

Опубликовано 29.09.2017 09:11

Просмотров: 321

23нче сентябрь көнне Яркәү районы, Дубровное авлында яшәүче Мәсхүдә Хатыйп кызы Минулинаны 90 яшьлек юбилее белән котларга авыл хакимияте башлыгы Валерий Федотов, социаль хезмәткәр Нина Жолобова һәм авыл ветераннар советы әгъзалары килделәр. Аларны әбинең кызлары Тәнзилә белән Зөбәйдә табын әзерләп көтеп алдылар. Хакимият башлыгы Мәсхүдә Хатыйп кызын туган көне уңаеннан РФ Президенты Владимир Путинның тәбрикләү хатын тапшырды. Әби ил башлыгы игътибарына һәм якташларының изге теләкләре, әзерләп килгән бүләкләренә сөенеп туя алмады.

Мәсхүдә Хатыйп кызының балачагы сугыш чоры балаларыныкыннан бер дә аерылмый, зур гаиләдә дә үскәч, аңа эне-сеңелләрен аякка бастырышырга кирәк була, шул сәбәпле хезмәт юлын ул 12 яшендә башлап җибәрә. 7нче сыйныфны тәмамлагач та аңа укуын дәвам итәргә насыйп булмый. 1948нче елда Гафият Хәбиб улына тормышка чыга, аннары ул аны 3 ел армия хезмәтеннән көтә. Туган ил каршындагы бурычын үтәп кайткач, Гафият Хәбиб улы Яркәү районының төрле совхозларында 40 елга якын җитәкче вазифасын үти. Минулиннар гаиләсе бер авылдан икенчесенә күченеп йөриләр.

Кайда гына яшәсәләр дә, тыйнаклыгы, гадилеге, түземлелеге белән аерылып торган Мәсхүдә Хатыйп кызы авыл халкының хөрмәтен яулый. Тормыш иптәшенә дә ышанычлы терәк була белә. Гафият Хәбиб улы үз вазифасыннан башка җәмәгать эшләрен дә алып бара, шул сәбәпле хуҗалык эшләре, билгеле, Мәсхүдә Хатыйп кызы өстендә була. Үзен совхоз рәисе хатыны дип тормый ул, халык белән беррәттән совхоз эшен дә башкара: югары Сидорово авылыннан Плехановога ат белән сөт ташый, Покровка балалар бакчасында бала караучы, Дубровное икмәк пешерү йортында ипи пешерүче булып эшли. Тормыш иптәше районда күренекле кеше булгач, Минулиннар йорты кунаклардан арынмый. Килүчеләрне уңган хуҗабикә өстәл тулы тәмле ашлар, ачык йөз белән каршылап, озатып калды. Гафият Хәбиб улы белән 48 ел бәхетле гомер кичереп, 3 бала үстерәләр. 1996 елда тормыш иптәше үлеп киткәч, бу югалтуны ул бик авыр кичерә. Ләкин янындагы бала-оныклары аңа төшенкелеккә бирелергә юл куймыйча, яшәргә көч бирәләр.

Рәүфә КАНГАЗИНА.