Улы туа, үзе үлә

Подробности

Опубликовано 20.10.2017 17:26

Просмотров: 514

Рузилә – гади авыл кызы. Мәктәпне тәмамлагач, шәһәргә барып, әллә ничә төрле һөнәр ала, университет тәмамлый.

Беркөнне кызлар белән җыелышып кафега бәйрәм итәргә бардык, - ди Рузилә. – Шунда беренче тапкыр карашларыбыз очрашты. Ул егет белән карашып утырдык та, аерылыштык. Ләкин шунысы сәер тоелды: мин кайчан киләм, шул вакытта гел кафеда бу. Югыйсә, көн дә йөрмибез бит. Соңыннан мондый еш очрашуларыбызның сере мәгълүм булды: ул кафеда эшләүчеләргә “теге кыз килсә, шалтыратыгыз” дип, телефон номерын калдырган икән.

Мәхәббәт шундый нәрсә инде ул: күп сорауларга җавап юк. Нигә без гашыйк булабыз? Нигә безне яраталар? Рузилә белән дә шулайрак була. Башта иптәш кызлары “ул бандитка охшаган” дисә, әнисе Светлана ул сиңа карт инде, үз тиңеңне табырсың дип, кызына йөргән егетен ташларга куша, әтисе дә булачак киявенә каршы икәнен белдерә.

Раилнең әти-әнисе дә кызны ошатмый, аның яшь булуы мөстәкыйль тормышка әзер булмавы шикләндерә. Очрашканда Рузиләгә – 21, Раилгә 35 яшь була. Кызны күреп аралашкач кына егетнең туганнары Рузиләгә карашларын үзгәртә. Шулай итеп, мәхәббәт барлык киртәләрне дә сикерә-сикерә узып китә... Тик. Кызганычка каршы, аларның бәхетләре берничә ел гына дәвам итә.

Равил кыска гомерле булып чыга. Бала туар чак җиткәч, Раил сөйгәненә шаярыпмы, әллә ахырын сизенепме: “Шамилне тудыр. Сиңа миннән истәлек булыр. Әле ул бик тә миңа охшаячак”, - ди. Раил туган малаен Ходайның бүләге, мәхәббәт җимеше итеп кабул итә. Аңа карап елмая, аптырый, бәхетеннән күктә йөзә...

Бу гаилә язмышы нәрсә белән тәмамлануын сөйләп тормыйм. Дөнья йөзенең барча балалары әти-әниләре кочагында үссеннәр, газиз кешесен югалтып ятимлекне күрергә язмасын үзләренә.

(“Яшьлек”).