Бәхетле гаилә сере

Подробности

Опубликовано 14.08.2015 08:05

Просмотров: 1048

Ике йорт. Берсендә көн дә диярлек ызгыш-талаш, ә икенчесендә -  тынлык. Чираттагы ызгыштан соң беренче йортта яшәүче хатын иренә: “Синең берәр кайчан күршеләрнең ызгышканнарын ишеткәнең булдымы? Юк! Менә сиңа гаҗәп! Бар, белеп кайт әле, ничек алар тавыш-гаугасыз яшиләр икән?!” – дигән. Ире хатынын тыңлап, күршеләре йортының тәрәзә төбенә барып яшеренгән дә, күзәтергә керешкән. Бу йортта һәркем үз эше белән мәшгульләр икән: хатыны аш бүлмәсендә, ә ире өстәлдә нидер яза. Шул чак телефон шалтыраган тавыш ишетелә. Ире сикереп торып алгы бүлмәгә йөгерә. Узган чакта өстәлдә утырган вазага бәрелә дә, савыт идәнгә төшеп чәлпәрәмә килә. Ир тизрәк ваза кыйпылчыкларын җыярга керешә. Тавышка аш бүлмәсеннән хатыны йөгереп чыга да иренә булышырга керешә. Ире : “Гафу ит, җаным, телефонга ашыгып, аңламыйча ваттым бу вазаны”, - дип гафу үтенде. Аңа җавап итеп хатын: “Юк, кадерлем, ваза ватылуында мин гаепле. Чөнки мин аны уңайсыз җиргә утыртканмын”, - дип сүзен бүлдерә.

Шул чак ире хатынын кочып үбә дә, бергәләшеп ваза кыйпылчыкларын җыеп чүп чиләгенә ташлыйлар. Бу хәлгә шаһит булган күрше ир тирән уйга кала. Өенә кайтып кергәч, хатыны кызыксынып: “Нәрсә, күршеләрнең гаилә серләрен белә алдыңмы?  Ни өчен алар әрләшмиләр, талашмыйлар икән?” - дип сорый. Ире тыныч кына:“Әйе, белдем, хатын. Алар гаиләсендә һәркем гаепле икән... Ә бездә - икебез дә һәрвакыт хаклы!” – дип җавап кайтара.

(Интернеттан. Рәүфә КАНГАЗИНА тәрҗемәсе).