Үлмәс белән Сәрвәр

Подробности

Опубликовано 01.05.2015 10:16

Просмотров: 693

Илгә азатлык алып килгән батырлар арасында Үлмәс Рәхимов та бар. Ул 1913 елның салкын кышында дөньяга аваз сала. Ризван белән Сәхипҗамалның ир балалары кыска гомерле булалар. Шуның өчен туган малайга Үлмәс дип исем кушалар. Бу исем улларын озын гомерле итәр дип фаразлыйлар.

1937 нче елда Үлмәс, тракторчылар курсын тәмамлап, кулына таныклык ала. Бөтен дәртен, көчен биреп эшләгәндә, дәһшәтле сугыш башлана. Алда Үлмәсне фронт көтә. 1941 елның 12 июлендә алдынгы тракторчы илне сакларга китә. Башта аны Ерак Көнчыгышка озаталар, чөнки анда японнардан ил чикләрен сакларга кирәк була. Тик 1942 елның язында гына ул фронтка эләгә. Елец шәһәре (Липецк өлкәсе) янында барган каты бәрелешләрдә Үлмәснең иңбашы яралана. Госпитальдә ярасы төзәлгәч, аны “Ворошиловец” маркалы авыр йөк тракторы йөртергә укыталар. Сталинград өчен барган сугышларда Үлмәс көндез алгы сызыкка корал ташый, ә төнлә белән ватылган танкларны Сталинград трактор заводына ремонтка алып чыга.

Соңгы тугызынчы танкны алып чыкканда аягы яралана, шулай да танкны заводка җиткерә. Башка яралылар белән бергә Үлмәсне госпитальгә озаталар. 6 айдан соң ул яңадан фронтка китә. Хәзер ул I Белорусc фронты составында сугышка керә. Көнчыгыш Пруссиядә барган сугышларда өченче тапкыр яралана. 7 ай госпитальдә дәваланып, 1945 елның азагында гына туган авылы Асланага әйләнеп кайта. Яңадан тракторда эшли башлый. Пенсиягә чыккач та, яшьләр белән беррәттән, урып-җыю эшләрендә катнаша. Сугыштагы батырлыгы, хезмәттәге тырышлыгы өчен ике орден һәм бик күп медальләр белән бүләкләнә. Үлмәс фронтка китү белән, хатыны Сәрвәр аның тракторына утыра. “Тимер атны” иярләү егерме яшьлек хатынга җиңел булмагандыр. Ләкин Бөек Җиңүне якынайту һәм яраткан иренең исән-сау сугыштан кайтуы өчен Сәрвәр бөтен авырлыкларга түзә. Әле ире фронттан кайткач та, эшен дәвам итә. 12 ел тракторда эшләү дәверендә Сәрвәр медальгә һәм башка бүләкләргә лаек була.

Үлмәс абый белән Сәрвәр апа 56 ел бергә олы тормыш юлын үтәләр. Билгеле, тормыш алып барулары җиңел булмагандыр: эштә дә сынатмаска, өйдәге хуҗалыкны да алып барырга, 7 кыз белән бер улны тәрбияләргә дә бик күп тир түгәргә туры килә. Алар корычтай нык ихтыяр көче белән авырлыкларны җиңеп, һаман алга, яңа үрләргә омтылганнар.

Рафаил МАГЖАНОВ,
Ялутор районы, Аслана авылы.